(दृश्यपत्रकारिता) 

हरिभगिनी वृत्त 

(८,८,८,६)

(अंतरा असेल तर ८+६)

(चाल: एरवी श्रावणमासी 

हा फटका आहे म्हणून

चाल: बिकट वाट वहिवाट नसावी) 

फटका म्हणजे समाजातील वाईट प्रवृत्तींवर ओढलेला आसूड. अनंतफंदींनी  फटका हा काव्यप्रकार प्रसिद्ध केला. कुसुमाग्रजांचा स्वातंत्र्यदेवतेची विनवणी हा फटकाही याच वृत्तात आहे. 

दृश्यपत्रकारिता

पत्रकारिता कशी नसावी| नमुना त्याचा होउ नको|

लोकशाहिच्या| चवथ्या स्तंभा| दर्जा खाली| नेउ नको

वरची पट्टी| आवाजाची| किंचाळोनी| पुन्हा पुन्हा |

वार्ता पहिली| ताजी ताजी| अम्हीच देऊ| सर्व जनां

दूध शेरभर| मुंगीला त्या| चला दावितो| तिच्या बिळा|

माइक घेउन| मुंगीला त्या| पुसती होत्या| कशा कळा|

पत्रकारिता पीत नको|

अतिशय उक्ती विकू नको|

चघळुन वार्ता सांगु नको|

सत्याचा अपलाप नको|

जोपासावी| चौकस वृत्ती| खोट्या माना भुलू नको|

लोकशाहिच्या| चवथ्या स्तंभा| सवंग चर्चा| दावु नको|

पाऊस पाणी| नसे कोळपे| टांगुन घेई| शेतकरी 

जळून जाई| घरसंसार नि| बापुडवाणी| पिले कशी|

बलात्कारिता| अभागिनीचे| मायबाप ते| विलापिती|

नदीत प्रेते| वाहत जाती| अपघाती हो| मृत्यु कधी|

करुनि भांडवल| या दुःखाचे| पुन्हा पुन्हा त्या| दृश्यफिती

नाट्याचे त्यां| रंग देउनी| विकू पाहती| दुःख किती

दुःखाचे कधि नाट्य नको|

“काय भावना?” पुसू नको|

गणगोतांना त्रास नको|

बीभत्स काहि दावु नको|

प्रेताच्या त्या| टाळूवरचे| लोणी खाया| सवकु नको|

लोकशाहिच्या| चवथ्या स्तंभा| गिधाडापरी| टपकु  नको|

कोण अधिक त्या| वार्ता देतो| स्पर्धा तुंबळ| सुरू असे|

शंभर मथळे| वाचत जाती| शब्द न काही|  स्पष्ट कळे|

पोलीसांनी| चोर पकडला|  रचना सोपी| लिहीत ना|

पोलिसांकडुन| चोर पकडला| कर्मणि वापर| ‘कडून’चा |

हा जो आहे| तो व्यक्ती हे| वाक्यावाक्या|मधे वसे

ह्या ठिकाणी अन त्या ठिकाणी| सुरुवातीला कायम ते|

शब्द सैल ते सोडु नको|

लिंगे वचने बदलु नको|

गडबड वाचन करू नको|

अवजड अवघड वाक्य नको|

उथळपणाची| कमाल झाली| आशय गेला| रसातळा|

कशा बातम्या| मथळे देती| तऱ्हेतऱ्हेच्या| पहा कळा|

कुणकुण लागे| गुन्हा भयंकर| आणावा तो| सामोरे|

दबाव येता| पक्षाचा वा| पैशांची ती| भीड पडे

काणाडोळा| करुनि तिथे मग|  गाडुन टाकू| नीती रे|

सोंगहि बाणेदारपणाचे| आणुन त्वेषे| बोलू रे|

सत्याचे हो| पाइक आम्ही|  जनतेचे ते| कैवारी 

नागरिकांना| भान दावण्या| उघडुन डोळे| सज्ज अम्ही 

धमक्यांना त्या भिऊ नको|

पक्षपात तो करू नको|

दिशाभूल ती नको नको|

नैतिकता ती विसरु नको|

ढोंग विषमता| अन्यायाला| वाचा फोडी| डरू नको|

अंजन घालुनी| सत्याचे अन| पंथ दावया| कचरु नको|

लोकशाहिच्या चवथ्या स्तंभा दर्जा खाली नेऊ नको|