खाली वृक्ष/वेली/भाज्यांचे वर्णन दिले आहे; त्यावरून नावे ओळखायची आहेत. वर्णाक्षरांचे गट दिले आहेत – म्हणजे
प ते म विभागात पिंपळी, मेंदी असतील. सगळ्याच अक्षरांपासून नावे आहेत असे नाही.
महत्त्वाचं म्हणजे या शब्दांमध्ये एका अक्षरावर अनुस्वार आहे – तो शब्दातील कोणत्याही अक्षरावर असेल. वर्णनापुढे जेवढ्या रेघा आहेत तितकी अक्षरे आहेत आणि काही ठिकाणी यमकही जुळवलेलं आहे; तर चला वृक्षवल्लींना भेटायला!
अ ते ए विभाग
१)लाकूड जड अन् रंगीत लाल
धागे देते याची साल _ _ _
२)मन म्हणत नाही खाणं पुरे आता, थांबा
मी तर सर्वांचा लाडका _ _(यमक)
३)साबण तेल आपटबार
असा मोठा कारभार
नाव नाही सोपं अगदी
मराठीत हिंगणबेट – संस्कृतात (यमक)
_ _ _
४)उच्चारताना होतो ओठांचा चंबू
मी तर आहे _ _ _ _(यमक)
५)खारींचं खोपट, दाराची चौकट
स्त्रीची वेस, येतंय ओळखू? की लागली ठेच
_ _ _
६)पोट करतंय बंड?
आलोच धावून मी तो _ _ _
(यमक)
क ते घ वर्ग
७)काळाभोर रंग अन् काटेरी वेणी
कोंबडा कोंबडीच्या खेळाची गाते गाणी _ _ _ _
८)सगळ्या माझ्या भावंडांचं सारखंच वजन
सोनं मोजायला माझंच उपयोजन
_ _
च ते झ वर्ग
९)फुलं खेळती फांदीवर
फारशी नाही त्यांची ओढ
महत्त्वाचं माझं सुगंधी खोड
_ _ _
१०)कधी पांढरा कधी लाल
जात माझी ‘पाणेरी’
उन्हाळा बाधत नाही, आनंदतात खाणारी _ _
११)पिवळी गोंडस फुले साजिरी
फुलती येता दसरा जवळी _ _
ट ते ढ वर्ग
१२)रानमेवा वेचायाला म्हातारी अन् तरणी
येई उन्हाळा जेव्हा
फळांनी भरते _ _ _ (यमक)
१३)एकसारखे दिसती
लालचुटुक मोती
त्यांची उपमा खाशी
सुंदरशा रदनांसी _ _ _
त ते न वर्ग
१४)तारुण्यात हिरवेगार
पांढऱ्या रेषा बहारदार
कोवळे नाही खुडले तर
रागावेल आतून लालेलाल _ _ _
१५)गोलमटोल वाटोळा
शुभ्र पांढरा भोपळा
नावात माझ्या आहे देव
पट्कन ओळखा नाही वेळ
_ _ _ _ _
१६)ताप ताप तापले
अंगांग फुलले
पोटात साठवून ठेवले पाणी
जवळ आलात तर टोचून काढी
_ _ _ _
प ते म वर्ग
१७)फुलून फुलून कहर
लालचुटुक बहर _ _ _
१८) ‘रोग जाय दुधेसाखरे। तरी _ _ कां पियावा ।’
इथे दोन अक्षरीऐवजी ५ अक्षरी शब्द त्याच कुळातला.
_ _ _ _ _
१९)आला पावसाळा रानभाज्यांचे हिरवेगार रंग
वाल घालून करू चला खमंग
_ _ _(यमक)
२०)शुभ्र पांढऱ्या पाच पाकळ्या
मधे विराजे परागमुकुट
श्रीगणेशाचे स्थान म्हणे हे
सोडवा बरे हे कूट _ _ _
य ते ज्ञ वर्ग
२१)लाल फळे ही लगडुन कैसा उन्हाळ महिना आला
गाऊ _ _ _ चे गाणे लल्लल लल्लल ला ला
२२)निळसर तांबडे फूल वाळते
मसाल्यास ते सजवुन जाते
वरती दिसती चारही शिंगं
माझे नाव आहे _ _ _(यमक)
२३)पहिली दोन अक्षरे एकच वर्णी
चौथं आणि पहिलं जंगली प्राणी
स्थान माझं घरी आजीबाईंचा बटवा
चला लवकर लवकर माझी ओळख पटवा _ _ _ _
२४)दुसरं तिसरं अक्षर तो गरगर फिरतो
तिसरं दुसरं अक्षर चटका देतो
होतोय याचा उलगडा?
अहो मी तर उपासाचा लाडका
_ _ _(यमक)
२५)दुसऱ्या तिसऱ्या अक्षराची ऊब पांघरू
पहिल्या तीन अक्षरांत भटकून येऊ
काश्मीरला भटकताना फळांचा गंध
मटकवू पट्कन _ _ _ _ _(यमक)
२६)पचनात याचा मोठा मान
फोडणीत याचं दुसरं स्थान
जेव्हा ना दे कोणी मान
तेव्हा म्हणीत गुंफती यास _ _
उत्तर इतरत्र..
