‘एक मुलगी माझ्या आत’ ही त्या दृष्टीने एक प्रत्ययकारी कविता म्हणता येईल. कविमनाचे कुतूहल अनेक कवितांमधून व्यक्त होताना दिसते.  

‘कॅनव्हास’ या कवितेत कवी म्हणतो, 

“रंगा – रंगांमधील बारीक-सारीक छटा 

घ्याव्यात आधी जाणून

 तेव्हा हे विश्व, कुठं येतं उमजून

असणारं असतं… दिसणारं दिसतं. त्याच्या एकाच रूपात मुळीच अडकू नये…” 

कविमनाचं व्यापकपण किती सहजतेनं येथे व्यक्त झाले आहे. ‘शेवट नसणारी गोष्ट’ या कवितेतील   

‘आपल्या अमोल अस्तित्वासाठी एक रूप तर हवेच असते प्रत्येकाला.’  

ही साधीच काव्यपंक्ती जगण्याची शहाणीव जागवते. या कवितांमध्ये अव्यक्त भावनेचे व्यक्त होणे हा प्रवास आहे. हा प्रवास शांत, संयमी आणि आत्मीय आहे. तो गोंगाट करत नाही; उलट वाचकाला स्वतःच्या आयुष्यातील एका शांत कोपऱ्यात नेऊन बसवतो.

 ‘प्रेमाची गोष्ट’ ही तर कवीचीच गोष्ट आहे. स्वतःकडेच तटस्थपणे पाहणं किती सुंदर असतं हे वाचकाच्या येथे लक्षात येईल. लेखक आणि डिक्शनरीचं एक अनोखं नातं एखाद्या घटितचित्रासारखं एकेका कडव्यागणिक पुढे पुढे सरकत जातं आणि वाचक त्यात रमूनही जातो. या संग्रहातील कवितांची भाषा साधी, प्रवाही आणि बोलकी आहे. भाषेत आडाखे नाहीत, कृत्रिम अलंकार नाहीत. रूपकांचा वापर कोमल आणि अर्थवाही आहे – नातेसंबंध कधी आभाळासारखे विशाल, कधी पावसासारखे टिपूर, तर कधी दगडात उमलणाऱ्या फुलासारखे नाजूक म्हणून उलगडतात. महत्त्वाचे म्हणजे कवीने सृष्टीतील निर्जीव घटकांनाही चैतन्य दिले आहे. 

‘मी स्वेट शर्ट बोलतोय…’

या कवितेत चेतनगुणोक्ती अलंकार वापरून वस्तूंना चैतन्यरूपात पाहणं, अनुभवणं आणि त्यांचे भावविश्व चितारणं किती वेगळा अनुभव देणारं आहे हे वाचकांच्या लक्षात येईल. या काव्यसंग्रहात केवळ सव्वीस कविता असून त्या ‘स्त्री तुझा रंग कसा?,’ ‘निसर्गाच्या सान्निध्यात/कलेच्या प्रांगणात,’ ‘तोच मी,’ ‘ पोर्ट्रेट पोएम्स,’  ‘कवीची दुर्बीण’ अशा सहा भागांत त्यांची विभागणी केली आहे. पुस्तकाचे रंगीबेरंगी बोलके मुखपृष्ठच वाचकाला वेधून घेते. संग्रहातील कवितांच्या आशयानुसार रेखलेली सुंदर रेखाचित्रे, अंतर्गत सजावट यांमुळेही पुस्तक देखणे झाले आहे. 

‘एक नातं असंही’ हे शीर्षकच अर्थवाही आहे. येथे कवी नातेसंबंधांचे नवे अर्थ शोधतो. कधी नाते स्वतःशीच असते, कधी प्रकृतीशी, कधी शब्दांशी, कधी अपरिचिताशी. काही कवितांमध्ये स्वतःचा शोध आहे; तर काही कवितांमध्ये नात्यातील मुक्ततेचा आग्रह आहे.

या आशयवैविध्यामुळे साधेच शब्द प्रभावी झाले आहेत आणि त्यांनी संग्रहाला एकसुरी होऊ दिलेले नाही. उलट प्रत्येक कविता भावभावनांचा नवा प्रदेश वाचकाला दाखवते. सर्वांनी जरूर वाचावा व संग्रही ठेवावा असा हा कवितासंग्रह आहे. 

 कविता संग्रह : एक नातं असंही

 कवी : चैतन्य सदाशिव डुम्बरे 

प्रकाशन: डिंपल पब्लिकेशन